Soms Herfokus God Ons Uitkyk om Ons Harte te Heel
Soveel Christene het vandag te doen met diepe bekommernis en angs. Hulle spanning laat hulle snags rondrol en dit lei soms selfs tot fisieke probleme. As dit jou beskryf, kan ek jou verseker dat, maak nie saak wat jou bekommernis of vrees veroorsaak nie, Jesus het jou oplossing.
Hierdie oplossing verskyn in Lukas 12, toe 'n angstige menigte so desperaat was om hoop te hoor van Jesus af dat hulle 'n byna tragedie veroorsaak het. “Toe duisende van die skare ondertussen saamkom, sodat hulle mekaar vertrap het” (Lukas 12:1, AFR53). Ek deins terug by die gedagte daaraan dat dit gebeur het.
Jesus het die mense se desperaatheid op 'n ongewone manier aangespreek. Hy het sy preek geopen deur te sê: “Pas veral op vir die suurdeeg van die Fariseërs, dit is geveinsdheid” (Lukas 12:1). Ek wonder of Hy die vertrappingtoneel met die Fariseërs se leer wou verbind. Het hulle skynheiligheid op een of ander manier die skare se desperaatheid gevoed, wat veroorsaak het dat mense hulle medegelowiges veronagsaam het? Ek is nie seker van die antwoord nie, maar ek sien vandag parallelle in die kerk.
Baie Christene se bekommernisse steek ‘n geestelike paniek aan die brand.
Wanneer ons deesdae die nuus aanskakel, kan ons maklik ontstel word. Die wêreld is onderstebo gekeer met rampspoed; die kultuur is in chaos en broer staan broer teë in die kerk. Sulke verdeeldheid was duidelik in die toneel wat Lukas beskryf. “En een van die skare sê vir Hom: Meester, sê vir my broer dat hy die erfenis met my moet deel” (Lukas 12:13).
Hierdie erfenis was dalk deurslaggewend vir die man se oorlewing, so hoe het Jesus hierdie kwessie aangespreek? Wat het Hy gesê oor die man se angs oor die verlies van dit wat dalk regmatig syne was? Jy sal dalk Christus se reaksie verbasend vind. “Maar Hy antwoord hom: Mens, wie het My as ‘n regter of deler oor julle aangestel? En Hy sê vir hulle: Pas op en wees op julle hoede vir die hebsug, want iemand se lewe bestaan nie uit die oorvloed van sy besittings nie” (Lukas 12:14-15).
Party mense wat dit gehoor het, sou dit dalk as 'n belediging beskou het. Jesus was in werklikheid besig om 'n diep geestelike waarheid aan te raak. Vir die meeste van ons, draai angs om dinge van die daaglikse lewe: finansies, spanning in die gesin, dit wat ons toekoms inhou. Dit is alles baie werklike kwessies wat draai om basiese hoop en behoeftes, en die Skrif het baie te sê oor verantwoordelik lewe.
Jesus beveel ons egter om nie bekommerd te wees oor selfs die basiese dinge nie. “Daarom sê Ek vir julle: Moenie julle kwel oor jul lewe, wat julle sal eet, of oor jul liggaam, wat julle sal aantrek nie. Die lewe is meer as voedsel en die liggaam meer as klere” (Lukas 12:22-23).
Ek weet nie van jou nie, maar soms kan ek deur angs gedryf word. Ek raak selfs angstig oor my angs. Die feit is dat die wêreld selfs die kalmste persoon genoeg rede gee om elke minuut van elke dag bekommerd te wees. Hoekom sou Jesus dus bloot vir ons sê om op te hou om angstig te wees?
Jesus soek na iets wat menslike angs te bowe gaan en ons oë op die liefdevolle, hemelse Vader vestig.
Jesus raak eintlik die middelpunt van ons lewens aan: ons drome, ons bekommernisse en selfs ons doel in die lewe. Twee kort verse openbaar dit. “En wie onder julle kan, deur hom te kwel, een el by sy lengte voeg? As julle dan selfs nie die geringste kan doen nie, waarom kwel julle jul oor die ander dinge?” (Lukas 12:25-26).
Laat ek hier iets belangrik uitwys. Om dit eenvoudig te stel, ons het nie beheer nie. Om te dink dat ons uiteindelik wel beheer het, is 'n illusie. Ons weet nie wat ons mediese verslag sal inhou nie, selfs al leef ons verantwoordelik op gesonde maniere. Ons weet nie hoe ons kinders sal uitdraai nie, al leer ons hulle liefdevol en geduldig God se weë. Ons weet nie hoe lank ons steeds werk sal hê nie, maak nie saak hoe uitsonderlik of getrou ons is om dit te verrig nie. Nie een van hierdie dinge is heeltemal binne ons beheer nie.
Dit verg baie geloof net om hierdie lewe te leef. So, hoe kan ons uit ons angs groei wanneer die wêreld enige oomblik onderstebo gekeer kan word? Verder, hoe kan ons groei tot nuwe geloof, die soort waarna Jesus hier wys?
Tot op hierdie stadium, het ek die siekte beskryf wat ons teister. Kom ons praat nou oor Jesus se kuur.
Jesus se doel in sy lering is nie soseer om ons te laat sleg voel oor ons bekommernisse nie as wat dit is om ons fokus te verander.
Jesus sê duidelik dat ons 'n soewereine hemelse Vader het aan wie ons ons lewens kan toevertrou.
“Julle moet ook nie soek wat julle sal eet of wat julle sal drink nie, en julle nie ongerus maak nie; want al hierdie dinge soek die nasies van die wêreld, en julle Vader weet dat julle hierdie dinge nodig het. Maar soek die koninkryk van God, en al hierdie dinge sal vir julle bygevoeg word” (Lukas 12:29-31).
Sê Jesus dat dit verkeerd is om finansieel verantwoordelik te wees? Sê Hy vir ons om onverskillig te wees teenoor 'n seën soos 'n erfenis van 'n geliefde? Nee, Hy praat van wat angs aan ons geestelike uitkyk kan doen. Dit kan onder andere veroorsaak dat ons hebsugtig raak.
Ons het reeds gesien dat ons bekommernisse meestal oor ons finansies, gesinskwessies, toekomssekerheid en ambisies handel. Trouens, dit vat nie veel vir hierdie dinge om ons harte met meedoënlose stukrag oor te neem nie. Jesus het 'n beter weg vir ons. Trouens, Hy sê dit is die bekommernisse van goddelose mense. Wanneer ons dit najaag en dieselfde bevrediging wil hê, onderwerp ons onsself aan dieselfde bekommernisse, spanning en strewe wat ons sien die wêreld oorheers.
Dit was die bedoeling agter Jesus se antwoord aan die man wat sy deel van 'n erfenis wou hê. Christus het in wese gesê: “Bewaak jou hart teen hebsug. As jy dit doen, sal dit nie net help om jou angs op te los nie, maar ook jou visie op die dinge van God te herfokus.”
As jou siel beswaard is, is die wortel van jou angs dalk eintlik hebsug.
Om goeie dinge te soek is nie 'n skande nie. Maar wanneer 'n hindernis ons pad na 'n goeie doelwit wat ons soek versper, kan daardie struikelblok angs of vrees veroorsaak.
Soms leef ons vir iets wat ons nooit sal hê nie. As ons dit reeds het, kan ons daaraan vasklou uit vrees om dit te verloor. Dit is albei belangrike menslike dryfvere, maar dit het daartoe gelei dat baie angstige Christene uitgebuit word deur valse leringe.
Ek hoor predikers sê: "Kom na ons kerk toe en al jou drome sal waar word." Daardie soort valse belofte maak aanspraak op 'n beheer wat nie 'n werklikheid is nie. Dit lei eintlik tot afgodery, die aanbidding van 'n stelsel wat sê dat ons alles kan hê wat ons wil hê. Nog erger, dit sê dat God op ons bevel handel. Nooit! Hierdie valse lering laat kwesbare mense wonder: “Hoekom het ek nog nie dit wat ek wil hê nie? Ek doen alles wat ek veronderstel is om te doen. Wat doen ek verkeerd? My versoek van God het op dowe ore geval. Daar moet iets sleg in my wees.”
Jesus se reaksie op ons bekommernisse is 'n alomvattende oplossing. Eerstens haal dit die druk van ons af. “Julle moet ook nie soek wat julle sal eet of wat julle moet drink nie, en julle nie ongerus maak nie; want al hierdie dinge soek die nasies van die wêreld, en julle Vader weet dat julle hierdie dinge nodig het. Maar soek die koninkryk van God, en al hierdie dinge sal vir julle bygevoeg word” (Lukas 12:29-31, my beklemtonings).
Hierdie gedeelte kom nie net by die wortel van baie angs, wat hebsug is, uit nie; dit openbaar ook die eenvoudige oplossing om ons oë op die belangrike ding te vestig: die koninkryk van God en sy geregtigheid. Met daardie fokus sê Jesus: “Maar soek eers die koninkryk van God en sy geregtigheid, en al hierdie dinge sal vir julle bygevoeg word” (Matthéüs 6:33).
Christus self was versoek met die basiese dinge wat ons nodig het.
Toe Jesus in die woestyn gevas het en uitgehonger was, het Satan hom versoek met alles, van wonderbaarlike kos voorsien tot van Hom 'n groot wêreldse heerser maak. Jesus se reaksie was om God se Woord oor sulke versoekings aan te haal. Dit het Satan laat vlug en die engele het gekom om na Christus se behoeftes om te sien. “Daarna het die duiwel Hom laat staan, en daar het engele gekom en Hom gedien” (Matthéüs 4:11).
Dit is hoe ons verlossing ook kom. “Trek die volle wapenrusting van God aan, sodat julle staande kan bly teen die liste van die duiwel” (Efésiërs 6:11). God se wapenrusting sluit in “die gordel van waarheid … die borswapen van geregtigheid … die bereidheid van die evangelie van vrede … die skild van geloof... waarmee julle al die vurige pyle van die Bose sal kan uitblus ... die helm van verlossing en die swaard van die Gees – dit is die woord van God” (Efésiërs 6:14-17).
Is jy ten volle toegerus? Of sluip jou angs deur enige deel van hierdie wapenrusting? Soos ons ons visie op die koninkryk van God instel, sal Hy alles aanspreek wat ons bekommerd maak. “Moenie vrees nie, klein kuddetjie, want jul Vader het ‘n welbehae daarin gehad om aan julle die koninkryk te gee” (Lukas 12:32). Jesus maak 'n einde aan al ons bekommernisse, want Hy hou die sleutel tot alles wat ons nodig het. Jy kan vertrou dat al jou spanning aangespreek sal word deur jou liefdevolle Vader wat alles tot jou beswil doen. Hy is jou toevlug, voorsiener en bevryder. Amen!