Omdat God jou liefhet, sal Hy daaraan werk om jou te reinig, maar dit is 'n liefdevolle tugtiging vir diegene wat hulleself bekeer en na Hom toe terugkeer. Jy sal miskien God se pyle in jou siel voel as gevolg van jou vorige en huidige sondes, maar as jy 'n berouvolle hart het en jou wil bekeer van dwaling, kan jy jou beroep op sy tugtigende liefde. Jy sal nie sy toorn voel soos die heidene nie, maar eerder die roede van sy dissipline, toegepas deur sy liefdevolle hand.
Wanneer jy weet jy het by jou laagste punt uitgekom, is dit tyd om die Here te soek met gebrokenheid, bekering en geloof.
Wanneer jy na God roep, stort Hy sy krag in jou uit. “Die dag toe ek geroep het, het U my verhoor, my moedig gemaak met krag in my siel... As ek te midde van benoudheid wandel, behou U my in die lewe; U steek u hand uit teen die toorn van my vyande, en u regterhand verlos my. Die HERE sal dit vir my voleindig! U goedertierenheid, HERE, is tot in ewigheid: laat nie vaar die werke van u hande nie” (Psalm 138:3,7–8, AFR53).
Een van die moeilikste dinge vir Christene om te aanvaar, is die lyding van die regverdiges. Daar is 'n foutiewe leerstelling wat sê dat as jy in ooreenstemming met God leef, sal jy nooit ly nie. Dit beweer, "Roep net na God, en Hy sal aangejaag kom en alles dadelik oplos." Dit is nie die evangelie nie! Die geloofshelde wat in Hebreërs 11 gelys word, het almal noue verhoudings met God gehad, en hulle het bespotting, marteling en gewelddadige sterftes gely (sien Hebreërs 11:36–38). Paulus self, wat nou saam met God gewandel het, het skipbreuk gely, was gestenig, geslaan, vir dood agtergelaat, beroof, tronk toe gestuur en vervolg. Hy het die verlies van alles gely.
God wil iets in ons harte plant deur ons beproewings. Hy wil hê ons moet kan sê: “Here Jesus, ek glo U heers oor die gebeure van my lewe. As iets met my gebeur, is dit net omdat U dit toegelaat het, en ek vertrou u plan daarmee. Help my om die les te verstaan wat U wil hê ek daaruit moet leer. As ek in geregtigheid wandel en u blydskap in my hart het, sal my lewe en sterwe U verheerlik. Ek sal sê: ‘Jesus, of ek nou lewe of sterwe, ek is U s’n!’”