Die sewende hoofstuk van Miga bevat een van die kragtigste boodskappe oor die nuwe verbond wat nog ooit verkondig is. In hierdie fenomenale preek praat Miga met die volk van Israel, maar hy praat ook met die kerk van Jesus Christus in hierdie laaste dae. Hy begin sy preek met 'n hartseer uitroep, een wat vandag nog gehoor word van geestelik uitgehongerde gelowiges regoor die wêreld: “Wee my! . . . [Daar is] geen tros om te eet nie” (Miga 7:1, AFR53).
Miga beskryf die effek van 'n hongersnood in Israel, 'n hongersnood van voedsel en van God se Woord. Sy boodskap herhaal die woorde van 'n vroeëre profesie deur Amos waar die Here sê: “Kyk, daar kom dae . . . dat Ek 'n honger in die land stuur, nie 'n honger na brood nie en nie 'n dors na water nie, maar om die woorde van die HERE te hoor. En hulle sal . . . rondslinger van noord na oos, om na die woord van die HERE te soek, maar hulle sal dit nie vind nie” (Amos 8:11–12).
Dit was oestyd in Israel en die wingerde moes tot barstens toe vol vrugte gewees het, maar daar het geen trosse aan die wingerde gehang nie. Miga het gekyk hoe mense na die wingerde gaan op soek na vrugte om te pluk en niks vind nie. In sy profetiese oog het Miga menigtes in die laaste dae gesien wat van plek tot plek jaag, op soek na 'n ware woord van God. Hy het gelowiges in die vooruitsig gestel wat van kerk tot kerk, van herlewing tot herlewing, van nasie tot nasie skarrel, almal op soek na 'n honger en dors na iets om hul siele mee te voed. Die uitroep word steeds gehoor: “Wee my. Daar is geen tros nie!”
Daar is ook 'n groot hongersnood in ons wêreld vandag. Ten spyte van groot getalle mense wat rondjaag op soek na geestelike voedsel, bestaan diegene wat God se Woord waarlik begeer net uit 'n klein aantal (sien Miga 7:14,18). Dit is seker vandag net so waar as wat dit in antieke Israel was. Min Christene vandag smag werklik daarna om die suiwer woord van die Here te hoor. In plaas daarvan, voer die meerderheid hulself vet op Sodom se appels en eet die strooi van verdraaide evangelies. Ons moet wakker word tot 'n ware begeerte na die Woord! Ons moet die heilige waarheid van die Skrif deel met diegene wat desperaat en honger is.