“Elkeen wat dan My sal bely voor die mense, hom sal Ek ook bely voor my Vader wat in die hemele is. Maar elkeen wat My verloën voor die mense, hom sal Ek ook verloën voor my Vader wat in die hemele is” (Matthéüs 10:32-33, AFR53).
Die Griekse woord vir bely in hierdie gedeelte beteken verbond, instemming of ooreenkoms. Jesus praat van 'n ooreenkoms wat ons met Hom het. Ons deel van die ooreenkoms is om Hom in ons daaglikse lewe te bely of te verteenwoordig. Ons moet leef deur sy beloftes van beskerming en persoonlike versorging vir ons, en ons moet getuig van sy wonderlike seëninge deur hoe ons leef.
Om Christus te bely, beteken meer as om in sy goddelikheid te glo. Die Bybel sê dat selfs demone dit glo en sidder oor hierdie kennis (sien Jakobus 2:19). Wat bedoel Jesus dan as Hy sê dat ons Hom voor die mense moet bely?
Wat het Christus vir sy hoorders voor die gedeelte in verse 32 en 33 gesê? Hy het gesê: “Word twee mossies nie vir 'n stuiwer verkoop nie? En nie een van hulle sal op die aarde val sonder julle Vader nie” (Matthéüs 10:29). Jesus het in wese vir hulle gesê: “Dink aan die miljoene voëls regoor die aarde. Dink nou aan al die voëls wat bestaan sedert die skepping. Tot vandag toe het nog nie een voël gesterf of is gevang sonder dat julle hemelse Vader dit weet nie.”
Hy het daarop gewys: “En julle is selfs die hare van die hoof almal getel” (Matthéüs 10:30). Christus het beklemtoon, “God is so groot dat ons Hom nie kan verstaan nie. Jy sal nooit kan begryp in hoeveel detail Hy vir jou sorg nie.”
Jesus het afgesluit deur te sê: “Wees dan nie bevrees nie; julle is meer werd as baie mossies” (Matthéüs 10:31), dan vat Hy alles saam deur te sê: “Elkeen wat dan My sal bely voor die mense, hom sal Ek ook bely voor my Vader wat in die hemele is” (Matthéüs 10:32). Hy sê in wese: “Dink aan wat Ek so pas aan julle geopenbaar het oor die Vader se alsienende, alwetende sorg. Jy moet hierdie waarheid aan die hele wêreld bely. Jy moet leef, asemhaal en getuig: ‘God sorg vir my.’ ”
Glo in die Vader se liefde vir jou en aanvaar sy intieme sorg vir jou. Lê al jou vrese en twyfel neer. Bely teenoor almal: "Sy oog is op die mossie en ek weet dat Hy oor my waak." Leef voor mense met die geloof dat God jou nie oor die hoof gesien het nie.