Elke oorwinning wat ons oor die vlees en die duiwel behaal, sal gou opgevolg word deur 'n nog groter versoeking en aanval. Satan sal eenvoudig nie moed opgee in sy stryd teen ons nie. As ons hom een keer verslaan, sal hy sy magte verdubbel en dadelik na ons toe terugkeer. Skielik sal ons onsself terug vind in 'n geestelike oorlog wat ons gedink het ons reeds gewen het.
Die Skrif sê vir ons: “Die Arameërs het hulle teenoor Dawid opgestel en teen hom geveg” (2 Samuel 10:17, AFR53). Dawid het teen dieselfde ou vyand te staan gekom, een wat hy gedink het hy reeds verslaan het. Dit is belangrik om daarop te let dat Dawid nie in hierdie tyd in sonde gelewe het nie. Hy was 'n godvresende man wat in die vrees van die Here gewandel het. Dawid was egter ook mens; en hy moes erg verward gewees het oor wat besig was om te gebeur. Waarom sou God toelaat dat hierdie vyand hom weer aanval?
Het jy al in Dawid se skoene gestaan? Baie van julle het al gebid: “Here, al wat ek wil hê, is om U te behaag, om u Woord te gehoorsaam en te doen wat reg is. U weet dat ek vas, bid en U Woord liefhet. Ek wil U nooit bedroef nie. So, hoekom word ek versoek? Hoekom gaan ek weer deur dieselfde stryd?”
Ek wonder of Dawid, te midde van sy verwarring, die belofte wat God 'n bietjie vroeër met hom gemaak het, onthou het. “Van die dag af dat Ek rigters oor my volk Israel aangestel het. Maar Ek sal jou rus gee van al jou vyande; en die HERE gee jou te kenne dat die HERE vir jou ‘n huis sal stig. As jou dae vol is en jy met jou vaders ontslaap het, sal Ek jou nakomeling wat uit jou liggaam sal voortkom, laat optree en sy koningskap bevestig” (2 Samuel 7:11-12).
Terwyl die duiwel elke wapen in die hel teen Dawid gewerp het, het die Here hom reeds belowe dat hy as oorwinnaar uit die stryd sou tree. In baie van die psalms het Dawid sy aandag verskuif van die aankomende vyand na die openbaringe van God se liefderyke goedhartigheid. Dit is wat God vir elkeen van sy kinders bedoel wanneer die vyand soos 'n vloedstroom teen hulle kom. Hy kom na hulle toe en sê: “Ek belowe, julle gaan uit hierdie posisie kom. Julle mag dalk gewond wees, maar Ek het julle reeds oorwinnaars gemaak.”