God aanvaar nie teësinnige diens van enigiemand nie. “En wat julle ook al doen, doen dit van harte soos vir die Here en nie vir mense nie” (Kolossense 3:23). “Van harte” beteken met jou hele hart, al jou krag, alles wat binne jou is.
Paulus skryf: “Laat elkeen gee soos hy hom in sy hart voorneem, nie met droefheid of uit dwang nie; want God het 'n blymoedige gewer lief” (2 Korinthiërs 9:7). Die apostel maak 'n dubbele toepassing van hierdie saak van gee; dit het te doen met ons finansiële offerhande en die gee van ons lewens aan God se werk.
Paulus het geskryf dat die kerk in Masedonië hom letterlik gesmeek het om hulle 'n kollekte vir die arm, lydende heiliges in Jerusalem te laat opneem. Hierdie Masedoniërs was so geheel en al aan die Here oorgegee, dat hulle uit hul armoede gegee het.
As jy net gee omdat jy glo dit word vereis. of as jy altyd wonder: "Is tiendes 'n Nuwe Testamentiese konsep of net Ou Testamenties?", is die gesindheid van jou hart heeltemal verkeerd. As jy 10 persent gee omdat die geestelike herder dit van jou vra, is dit ook verkeerd. Niks hiervan raak die kernsaak van wat dit beteken om te gee nie!
Ek word so diep veroordeel deur hierdie vers, want so dikwels gaan ek met my lewe en bediening aan sonder die vreugde van die Here. Het die diens van die Here vir jou vervelig geword, 'n sleurwerk? Is dit net 'n las wat jou meestal hartseer en moeg agterlaat? God wil nie hê jy moet kla oor jou las nie; Hy wil hê jy moet daardie dinge uit jou lewe verdryf deur sy Woord in besit te neem, wat jou tjekboek is vir sy hulpbronne deur geloof! Hy sê: “Ek het reeds vir jou voorsiening gemaak. Watter behoefte in jou lewe is so groot dat Ek nie meer as wat nodig is kan voorsien nie?”
Die woord vir blymoedig in Grieks beteken vrolik, bly, met 'n ligte hart, gewilligheid, blydskap, vol hilariteit. God sê in wese: “Wat jy ook al in jou arbeid vir My doen, of dit nou voorbidding is, My in my huis aanbid of My in jou afgesonderde binnekamer soek, doen dit met blymoedigheid! Wees bly en vrygewig met alles: jou geld, jou diens, jou tyd en jou lewe.” Om jouself oor te gee om God te behaag, moet dit spruit uit 'n blymoedige gees wat vir ons almal beskikbaar is deur eenvoudige, kinderlike geloof.