Jesus sê vir ons: "Julle is die lig van die wêreld" (Matthéüs 5:14, AFR53). Sy stelling gaan hier oor veel meer as net bediening. Dit strek verder as om onderrig te gee, preke te lewer of traktate uit te gee. Christus sê vir ons baie duidelik: "Julle is die lig." Hy sê in wese: “Julle is nie net 'n weerspieëling nie. Julle is nie net 'n kanaal nie. Julle is 'n lig, en die intensiteit van julle lig hang af van die intensiteit van julle wandel met My.”
Sien jy wat die Here hier impliseer? Die wêreld herken diegene wat naby Hom wandel. Jou bure of medewerkers weet miskien nie van jou daaglikse gemeenskap met Christus, jou geloof in Hom, jou volkome afhanklikheid van Hom nie. Hulle sien egter die lig wat uit jou straal as gevolg van die lewe wat jy saam met Hom het.
So, wie presies is hierdie ligte op 'n bergl? Waar sien ons hulle?
Dit is mense wat gewoonlik nie in die kollig gevind word nie. Hulle is nie een van die selfgesentreerde, selfbevorderende mense wat leef vir erkenning in hierdie wêreld nie. Hulle is nie van die selfbelangrike kerklike klieke wat voorgee dat hulle heilig is, maar skinder, murmureer en kla nie.
Deur die jare heen, het ek baie gelowiges gesien wat godvresend voorkom, maar in werklikheid geestelik lui is. Hulle vertel vir ander van hul tekortkominge en swakhede en dink dat dit hulle nederig maak, maar tog is hulle vinnig om ander te oordeel. Hulle besit nie die ware, vrygewige, liefdevolle dienaarsgees van Christus nie. Inteendeel, die “lig” wat hulle het, is in werklikheid duisternis. Jesus sê, “Maar as jou oog verkeerd is, sal jou hele liggaam donker wees. As dan die lig in jou donkerheid is, hoe groot is die duisternis nie!” (Matthéüs 6:23). Waar daar geen ware verandering deur Christus plaasvind nie, kan daar geen lig vir ander wees nie. Solank jy verhoed dat iets jou lewe in Christus belemmer, sal jou lig aanhou om in die donker te skyn.
“Julle is die lig van die wêreld. 'n Stad wat op 'n berg lê, kan nie weggesteek word nie” (Matthéüs 5:14). Jesus sê in wese: “Ek stel julle aan die wêreld ten toon. Mense kyk na julle, want Ek het julle 'n skouspel gemaak. Julle is 'n lig wat nie bedoel is om weggesteek te word nie.”
“Laat julle lig só skyn voor die mense, dat hulle julle goeie werke kan sien en julle Vader wat in die hemele is, verheerlik” (Matthéüs 5:16). Die rede waarom ons die lig vir die wêreld moet laat skyn, is sodat God verheerlik kan word.