“En Jesus het weer met hulle gespreek en gesê: Ek is die lig van die wêreld; wie My volg, sal sekerlik nie in die duisternis wandel nie, maar sal die lig van die lewe hê” (John 8:12, AFR53).
Jesus was en is steeds die lig van die wêreld. Johannes sê hierdie lig was voortgebring deur die lewe wat in Christus was: “In Hom was lewe, en die lewe was die lig van die mense” (Johannes 1:4). Eenvoudig gestel, die lewe wat Christus besit het, was sy bron van lig vir die wêreld, en almal wat glo, “sal die lig van die lewe hê” (Johannes 8:12). Wat is die “lewe agter die lig” waarvan die Skrif praat?
Die meeste van ons beskou hierdie lewe as die ewige bestaan wat in Christus beliggaam is. Ons sien dit as sy krag om almal wat glo, die ewige bestaan te gee, maar Johannes praat hier van selfs nog meer. Wanneer hy die woord “lewe” gebruik, praat hy van die hele biografie van Jesus se bestaan.
Jesus sê vir ons dat ons moet lewe soos Hy gelewe het. Vir ons om te wees soos Christus in die wêreld was, moet sy lewe iets wees wat ons self kan ken en ervaar. Ons moet dit met ons eie lewens kan vereenselwig.
Ek wil jou vertel hoe ek my kan vereenselwig met die lewe in Christus. Ek verheug my oor die vriendelike, klein dingetjies wat Jesus gedoen en gesê het. Ek glo dat sy daaglikse dade, woorde en wandel met die Vader bedoel is om die betekenis van die Christus-lewe vir ons te definieer.
Ek dink aan Jesus se vriendskap met Lasarus. Ek dink aan Hom waar Hy Homself afsonder ná 'n lang periode van bediening. Ek dink aan Hom waar Hy ontspan in die huis van Maria, Martha en Lasarus. Ek dink aan Jesus wat die kindertjies in sy arms neem en hulle seën. Ek dink aan sy gehoorsaamheid aan sy moeder, selfs as 'n volwasse man toe Hy, tydens die bruilofsfees, water in wyn verander het. Ek dink aan Jesus se liefde en omgee vir die geringes, die liefdeloses, die armes. Ek dink aan sy medelye met die vrou wat in owerspel betrap is, of toe Hy die weduwee wat net twee munte gehad het, erkenning gegee het.
In hierdie gedeeltes vind ons die maniere waarop ons ons lewens met Christus s'n kan vereenselwig. Dit is hoe ons 'n lewe moet lei wat in die lig is.