In 1958 was ek hartseer oor ‘n nuusberig oor sewe tienerseuns wat tereggestaan het weens die moord op ‘n kreupel seun. Die Heilige Gees het my so sterk opgewek dat ek gelei gevoel het om na die New York-hof te gaan waar die verhoor plaasgevind het, en ek het die hofsaal binnegegaan, oortuig dat die Gees my gevra het om met die jongmense te praat.
Toe die dag se sessie ten einde geloop het, het ek iets begin besef. Ek het gedink, “Daardie seuns sal in boeie by daardie sydeur uitgelei word, en ek sal hulle nooit weer sien nie.” Toe staan ek op en gaan met die gang af in die rigting van die regterbank, waar ek gevra het om met die seuns te mag praat voordat hulle na hul selle terugkeer. Binne ‘n oomblik het polisiemanne op my toegesak, en ek is sonder seremonie uit die hofsaal begelei. Flitsligte het oral om my geflits, en ek was oorval met vrae van verslaggewers wat oor die verhoor berig het. Ek kon net sprakeloos, heeltemal stomgeslaan daar staan, in ‘n vernederende, verleentheidsituasie. Ek het gedink, “Wat sal my kerk by die huis dink? Mense gaan dink ek is mal. Ek was so naïef.”
God het daardie dag die roepstem van hierdie arme man gehoor, en Hy het my stille geroep sedertdien geëer. Jy sien, uit daardie baie jammerlike toneel in die hofgebou is die Teen Challenge-bediening gebore, met ‘n wêreldwye reikwydte. En ek deel graag in Dawid se nederige getuienis uit Psalm 34: “My siel sal hom beroem in die HERE; die ootmoediges sal dit hoor en bly wees” (Psalm 34:3).
Dawid sê hier in wese: “Ek het iets om aan al God se nederige mense op aarde te vertel, nou en in die eeue wat kom. Solank hierdie wêreld bestaan, sal die Here elkeen red wat na Hom roep en op Hom vertrou. In sy ongelooflike barmhartigheid en liefde het Hy my verlos, al het ek ‘n baie dwase ding gedoen.”
Al wat jy moet weet, is dat ons geseënde Here elke opregte uitroep, hard of onuitgesproke hoor, en Hy reageer. Selfs as jy dwaas opgetree het of ‘n verskriklike mislukking beleef het, hoef jy net terug te keer na jou Verlosser. Hy is getrou om jou roepstem te hoor en in te gryp.